ស្ថិតិភ្ញៀវទេសចរបុណ្យចូលឆ្នាំប្រពៃណីជាតិខ្មែរខេត្តបាត់ដំបង

មន្ទីរទេសចរណ៍ខេត្ដបាត់ដំបង៖ របាយការណ៍ស្តីពីសកម្មភាព ស្ថានភាពទូទៅនិងស្ថិតិភ្ញៀវទេសចរដែលបានមកកម្សាន្តសប្បាយ នៅតាមបណ្តាគោលដៅទេសចរណ៍នានា ក្នុងឱកាសបុណ្យចូលឆ្នាំប្រពៃណីជាតិខ្មែរ រយៈពេល ០៣ថ្ងៃ គឺថ្ងៃទី ១៤ .១៥. ១៦ ខែមេសា ឆ្នាំ ២០១៨ ក្នុងខេត្តបាត់ដំបង ។ សភាពការណ៍ភ្ញៀវក្នុងថ្ងៃទី ១៤ – ១៥ និង ១៦ ខែ មេសា ឆ្នាំ ២០១៨ នេះ ឃើញថាមានការកើនឡើងខ្លាំងតាមរយៈការពិនិត្យតាមទីវត្តអារាម តាមដងផ្លូវ និងតាមគោលដៅទេសចរណ៍នានានៅក្នុងខេត្ត ។

សណ្ឋាគារ និងផ្ទះសំណាក់ភ្ញៀវបានចូលស្នាក់ពេញស្ទើរតែទាំងស្រុង ភ្ញៀវមួយចំនួនបានបន្តដំណើរទៅសម្រាក់នៅខេត្តបន្ទាយមានជ័យ ខេត្តប៉ៃលិន និងខេត្តពោធិសាត់ដោយសារនៅខេត្តបាត់ដំបងពុំមានបន្ទប់គ្រប់គ្រាន់។
១. អំពីសកម្មភាពទាក់ទាញសំខាន់ៗ
– ព្រឹត្តិការណ៍សង្ក្រានបាត់ដំបង មានភ្ញៀវចេញចូលប្រមាណ ៤៩៥០០០ នាក់ក្នុងរយៈពេល៣ថ្ងៃ
-ពិធីលេងល្បែងប្រជាប្រិយ និង លេងទឹកនៅប្រាសាទបាណន់ ប្រាសាទឯកភ្នំ និងតាមបណ្តាវត្តធំៗ មានទេសចរចូលរួមកម្សាន្តសប្បាយយ៉ាងច្រើនកុៈករ
-មន្ទីរធនធានទឹក និងឧត្តុនិយមបានបង្ហើបបង្ហូរទ្វារទឹកនៅទំនប់កំពីងពួយ ជូនទេសចរលេងទឹកកម្សាន្តយ៉ាងសប្បាយរីករាយ
– មណ្ឌលកម្សាន្តសុភមង្គលបានរៀបចំទីតាំងផ្តល់សេវាកីឡាលើទឺកប្រកបដោយភាពទាក់ទាញ ( ឧទ្យានកម្សាន្តលើទឹក )
-មណ្ឌលកម្សាន្តឡូរី នៅជើងភ្នំបាណន់ កំពុងជាទីពេញនិយមរបស់ភ្ញៀវទេសចរណ៍
ទាំងនេះជាព្រឹត្តិការណ៍ទាក់ទាញខ្លាំង បំពេញនូវចេតនារម្មណ៍ភ្ញៀវទេសចរណ៍ជាតិ និងអន្តរជាតិបានយ៉ាងល្អប្រសើរសម្រាប់ពិធីបុណ្យចូលឆ្នាំពៃណីជាតិខ្មែរ រយៈពេល ០៣ថ្ងៃ គឺថ្ងៃទី១៤.១៥.១៦ ខែមេសាឆ្នាំ២០១៨ នៅខេត្តបាត់ដំបង ។

២.អំពីសកម្មភាព
-មន្ទីរទេសចរណ៍ខេត្ត បានផ្សព្វផ្សាយលិខិតជូនដំណឹងដល់បងប្អូនប្រជាពលរដ្ឋ អាជីវករ ប្រតិបត្តិករទេសចរណ៍ ទាំងអស់ក្នុងខេត្តបាត់ដំបង មិនអោយមានការឡើងថ្លៃ នូវផលិតផលទាំងអស់ ក្នុងឧ៍កាសបុណ្យចូលឆ្នាំប្រពៃណីជាតិខ្មែរ រយៈពេល ០៣ ថ្ងៃ គឺថ្ងៃទី១៤.១៥.១៦ ខែមេសា ឆ្នាំ២០១៨នេះ ។
-មន្ទីរបានចាត់តាំងបែងចែកភារកិច្ចមន្រ្តីចុះប្រចាំការនៅតាមរមណីយដ្ឋាន សំខាន់ៗមួយចំនួន ដើម្បីសហការជាមួយអាជ្ញាធរស្រុក កងរាជអាវុធហត្ថស្រុក នគរបាលស្រុក និងនគរបាលទេសចរណ៍ក្នុងការរៀបចំសណ្តាប់ធ្នាប់ និងរក្សាសុវត្ថិភាពជូនភ្ញៀវទេសចរជាតិ និងអន្តជាតិ។
-ជម្រុញការរៀបចំ សណ្តាប់ធ្នាប់ ចំណតយានយន្ត និងកន្លែងលក់ដូរម្ហូបអាហារ អោយមានរបៀបរៀបរយ និងតម្លៃសមរម្យនៅតាមគោលដៅទេសចរណ៍សំខាន់ៗនៅក្នុងខេត្ត ។
-ណែនាំអោយមានការរៀបចំការសម្អាតអនាម័យបរិស្ថាន តាមកន្លែងលក់ដូររៀងៗខ្លួន
-បានចូលរួមសហការជាមួយរដ្ឋបាលខេត្តបាត់ដំបង សហភាពសហព័ន្ធយុវជនកម្ពុជាខេត្តបាត់ដំបង និងអង្គភាពពាក់ព័ន្ធ រៀបចំ និងផ្សព្វផ្សាយ អំពីព្រឹត្តិការណ៍ “សង្ក្រានបាត់ដំបង” លើកទី១។

៣.អំពីស្ថិតិភ្ញៀវ
ក្នុងឱកាសបុណ្យចូលឆ្នាំពៃណីជាតិខ្មែរ រយៈពេល ០៣ ថ្ងៃ គឺថ្ងៃទី ១៤.១៥.១៦ ខែមេសា ឆ្នាំ២០១៨ នេះ ភ្ញៀវទេសចរ ដែលបានមកកម្សាន្តសប្បាយតាមរមណីយដ្ឋានទេសចរណ៍នានា ក្នុងខេត្តបាត់ដំបង មានចំនួនសរុប ៧០០,០៤២ នាក់ មានការកើនឡើង ១៧៥.១២ % ប្រៀបធៀប ឆ្នាំ២០១៧ មានចំនួន ២៥៤,៤៤៦ នាក់ ។
-ភ្ញៀវទេសចរ ជាតិ មានចំនួន ៦៩៩,២១៣ នាក់ មានការកើនឡើង ១៧៥.១៨ % ប្រៀបធៀប ឆ្នាំ២០១៧ មានចំនួន ២៥៤,០៩៣ នាក់ ។
-ភ្ញៀវទេសចរ អន្តរជាតិ មានចំនួន ៨២៩ នាក់ មានការកើនឡើង ១៣៤.៨៤ % ប្រៀបធៀប ឆ្នាំ២០១៧ មានចំនួន៣៥៣ នាក់ ។
 កំណត់សម្គាល់៖ រមណីយដ្ឋានដែលមានភ្ញៀវទេសចរណ៍ច្រើនជាងគេគឺ:
-រមណីយដ្ឋានប្រាសាទបាណន់
-ឡូរីបាណន់
– រមណីយដ្ឋាន ចំការស្វាយ
-រមណីយដ្ឋាន កំពីងពួយ
-រមណីយដ្ឋាន ភ្នំសំពៅ
-រមណីយដ្ឋាន ប្រាសាទឯកភ្នំ
-រមណីយដ្ឋានជ្រលងបុព្វតា
-រមណីយដ្ឋានសេកសក
-រមណីយដ្ឋាន កោះ១០០០
-រមណីយដ្ឋាន ល្អាងភ្នំ ប្រាំពីរ
-ទំនប់កង្ហត
-ចំការទំពាំបាយជូ
ដោយឡែកនៅក្នុងក្រុងបាត់ដំបងព្រឹត្តិការណ៍សង្ក្រានបាត់ដំបងគឺជាមេដែកដ៏សំខាន់ដែលទាក់ទាញភ្ញៀវទេសចរអោយសម្រេចចិត្តមកស្នាក់នៅក្នុងខេត្តបាត់ដំបងយ៉ាងច្រើនក្នុងរយៈពេលយូរថ្ងៃ ។
៤. អនាម័យ បរិស្ថាន
នៅតាមរមណីយដ្ឋានទេសចរណ៍មួយចំនួន មន្ទីរ និងអ្នកគ្រប់គ្រងបានរៀបចំដាក់ធុងសម្រាមនៅតាមតូបលក់ អាហារមានដាក់កន្ត្រក សម្រាប់ភ្ញៀវទេសចរចោលកាកសំណល់ផ្សេងៗ ហេតុដូច្នេះអនាម័យមានភាពល្អប្រសើរ ចំនួនសម្រាមនៅតាមដងផ្លូវនិងនៅតាមគោលដៅទេសចរណ៍មានការថយចុះ។
៥. អំពីសន្តិសុខ សុវត្ថិភាព និង សណ្ដាប់ធ្នាប់
សណ្ដាប់ធ្នាប់ និងចរាចរ នៅតាមរមណីយដ្ឋានមានភាពល្អប្រសើរដោយមានភ្នាក់ងារសមត្ថកិច្ច អាជ្ញាធរ ឃុំ-ស្រុក កងរាជអាវុធហត្ថស្រុក នគរបាលស្រុក នគរបាលទេសចរណ៍បានសហការគ្នាយ៉ាងល្អក្នុងការ រៀបចំរក្សាអនាម័យ និងរៀបចំយានយន្តបានល្អ ដើម្បីជៀសវាងការស្ទះចរាចរក្នុងរមណីយដ្ឋាន រីឯការរៀបចំតូបលក់ចំណីអាហារ ផ្សេងៗក៏បានរៀបចំប្រកបដោយសណ្ដាប់ធ្នាប់ល្អសមរម្យ ។
៦. អំពីល្បែងប្រជាប្រិយ
តាមរមណីយដ្ខាននានា និង នៅតាមវត្តអារាម អាជ្ញាធរស្រុក បានសហការជាមួយមន្ទីរទេសចរណ៍ ក្នុងរៀបចំល្បែងកម្សាន្តជាច្រើនដូចជាៈ
– ល្បែងទាញព្រាត់- លាក់កន្សែង- បោះអង្គុញ- វាយក្អម- ឡើងសរសរខ្លាញ់ជាដើម
ក្នុងក្រុងបាត់ដំបងពេលរាត្រី មានការរៀបចំតាំងពិពណ៌មុខម្ហូបអាហារ និងបង្អែមខ្មែរ អ្នកស្រុកបាត់ដំបង និងមានការតាំពិពណ៌ផលិតផលខ្មែរ និងបរទេសជាច្រើនទៀត និងមានការប្រគុំតន្ត្រី ២កន្លែង ព្រមទាំងមានការបាញ់កាំជ្រួបង្ហោះគោម ដើម្បីចូលរួមអបអរសាទរបុណ្យ ចូលឆ្នាំពៃណីជាតិខ្មែរ ដែលរៀបចំដោយ សាលាខេត្តបាត់ដំបង មន្ទីរទេសចរណ៍ខេត្ត មន្ទីរវប្បធម៌និងវិចិត្រសិល្បៈខេត្ត សាលាក្រុងបាត់ដំបង និងមន្ទីរពាក់ព័ន្ធនានាជុំវិញខេត្ត ។
៧. សេវាម្ហូបអាហារ
មន្ទីរបានធ្វើការសំណូមពរ និងអំពាវនាវដល់អ្នកលក់ម្ហូបអាហារ ក្នុងភោជនីយដ្ឋាន អាហារដ្ឋាន រមណីយដ្ឋាន ទាំងអស់ នៅក្នុងខេត្តបាត់ដំបង រក្សានូវគុណភាពម្ហូបអាហារនិងមិនអោយមានការតម្លើងថ្លែ ក្នុងឱកាសបុណ្យចូលឆ្នាំប្រពៃណីជាតិខ្មែរ រយៈពេល៣ថ្ងៃ។
៨. ជាលទ្ធផល
មន្ទីរទេសចរណ៍ពិនិត្យឃើញថា ភ្ញៀវទេសចរមានការកើនឡើងជាលំដាប់ ដោយសារគោលនយោបាយរាជរដ្ឋាភិបាល ក្រោមការដឹកនាំដ៍ឈ្លាសវៃរបស់ សម្តេចអក្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ជាប្រមុខដឹកនាំដែលធ្វើប្រជាពលរដ្ឋ មានជីវភាពធូធារ ជម្រុញឱ្យមានការធ្វើដំណើរកម្សាន្ត ។ ម្យ៉ាងវិញដោយមានការចង្អុលបង្ហាញពីថ្នាក់ដឹកនាំក្រសួងទេសចរណ៍ ក៏ដូចជាថ្នាក់ដឹកនាំខេត្ត និងមន្ទីរទេសចរណ៍ផ្ទាល់បានខិតខំយកចិត្តទុកដាក់អនុវត្តន៍តួនាទីភារកិច្ច ជម្រុញដល់ការងារអភិវឌ្ឍវិស័យទេសចរណ៍ ក្នុងខេត្តបាត់ដំបង បានកាន់តែល្អប្រសើរឡើងជាលំដាប់ ហេដ្ឋារចនាសម្ព័ន្ធ ទៅកាន់តំបន់រមណីយដ្ឋាន នានា មានភាពល្អប្រសើរ មានសន្តិសុខ សណ្ដាប់ធ្នាប់ អនាម័យ បរិស្ថានល្អប្រសើរ ហើយ តម្លៃម្ហូបអាហារ នៅតាមបណ្តាគោលដៅទេសចរណ៍នានា មានការឡើងថ្លៃបន្តិចបន្តួច ។ មន្ទីរ និង ខិតខំសិក្សាស្រាវជ្រាវរៀបចំគោលដៅទេសចរណ៍ថ្មីៗបន្ថែមទៀត ធ្វើយ៉ាងណាទាក់ទាញភ្ញៀវទេសចរ ឱ្យសម្រេចចិត្តមកកម្សាន្តនិងស្នាក់នៅក្នុងខេត្តបាត់ដំបងអោយកាន់តែច្រើនបន្ថែមទៀត ។

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *